獅子，書面語獅，（學名：Panthera leo），係一種住響非洲同亞洲嘅大型貓科動物，其雄性嘅鬃毛係佢嘅特徵之一。係大型貓科動物中最成功嘅一種動物，過去佢分布響多個洲，今天佢嘅生存環境已經相當細。
漢語【獅子】，梵語為 Simba，傳入中國後漢代初被譯為狻麂（音「酸己」），後嚟因當時仲有一種叫狻猊（音「酸倪」，係古時對獅子嘅稱呼）嘅猛獸，古人為咗分得清晰啲，就攞咗 Simba 嘅頭一個音，譯為師，又因為佢係獸類，於是又加上犭部，就成為咗獅字。

特徵
以前響歐洲南部、西亞、印度、非洲都有獅子。冰河時期有一個亞種響中歐和北美洲生存過，冰河時期之後佢哋就消失咗。按嗰時學者嘅報導，古希臘時期喺巴爾幹半島仲有獅生存。一般認為歐洲嘅獅喺公元一世紀由於人類嘅活動絕晒種。
今天絕大多數獅住響非洲撒哈拉沙漠以南，撒哈拉沙漠以北嘅獅子喺 1940年代冇晒。20世紀時喺亞洲嘅獅幾乎全部絕晒種，只係響印度嘅一個自然公園仲有凈番一啲響度。以前除咗森林之外，所有嘅生態環境都有獅子，今時今日佢哋嘅生存環境大大縮細。獅子比較鍾意草原，亦會響旱林同半沙漠中出現，就唔會響沙漠和雨林住。
中國並無獅子出產，係西漢時期（公元前138年）張騫出使西域時，開闢咗溝通中亞、西亞地區嘅絲綢之路，由於嗰帶有好多獅子，所以將佢帶返中國作為貢品。

生活方式
與其它大型貓唔同，獅子係一班獅子住埋一齊嘅， 一個獅子群主要由有血緣關係嘅雌性獅子組成，地形同埋獵物嘅多少決定一個獅子群嘅大細，一個群有 3 至 30 隻獅子。獅子公只會留響一群獅子裏面留一段時間，之後佢就會離開，去另一群獅子度。雖然係咁，獅子公嘅地位高過獅子乸嘅地位，一般一個獅子群只有一隻成年嘅獅子公，獅子仔只會留響一群獅子裏面留三年，之後就會俾趕走，而雌性獅子會留低。後生嘅雄獅子會唔穩定咁「一班人」走埋一齊，過著游游蕩蕩嘅生活，直到佢哋自己變成一個獅子群嘅阿頭，一般要到六歲或更老先可以做倒。
一般嚟講，當隻獅子公老咗或變得虛弱嗰時，就會有後生嘅獅子公向佢挑戰，輸咗嘅獅子唔係死就係走路，假如新來嘅獅子打贏，佢就會殺晒以前生落嘅獅子仔，咁呢就比較容易同啲獅子乸交配。
一班獅子嘅地盤面積從 20 到 400 平方千米，大細由班獅子嘅數目同地盤裏面嘅獵物數目決定。班獅子會用屎、尿、老遠都聽倒嘅叫聲嚟霸地盤。冇地盤嘅一班獅子會四圍游游蕩蕩。

社會結構
雖然獅子公響一班獅子有好高地位，但係只係得隻獅子乸同意先可以同佢交配。如果獅子乸願意嘅話，佢就會趴響地，畀隻獅子公騎住。只要睇下獅子乸點對隻獅子公，就知隻獅子公地位有幾高。同埋，知道佢會唔會下次打唔過畀人趕走。
獅子乸陀獅子仔四個月到，只會生兩到四隻。獅子仔重1.5千克到。獅子仔唔單止可以啜阿媽奶，重可啜其他乸嘅奶，皆因養獅子仔係成羣獅子嘅責住。獅子仔出世四個月之後會戒奶，之後重會跟阿媽兩年。獅子乸要三年先大，公就要五年。
獅子有廿年命，不過通常係乸先有咁長命。公通常未到呢個年紀，唔係畀後生殺死，就係畀後生嘅趕走。趕走之後就唔會再入到另一班獅子，跟住隻公就會餓死。所以，獅子公好少會過12歲。不過，響動物園，有啲獅子可以有成34年命。

繁殖
一般係由獅乸打獵，獅子公只係響佢哋後生、鬃毛未出齊嗰陣先學打獵。啲深色嘅鬃毛好容易俾佢嘅獵物發現，唔容易捉到獵物。一般佢哋先哩埋，接近啲獵物，然後撲向獵物，撳佢落地，細嘅獵物一般被咬甩頭，大嘅獵物咬斷頸或被壓到窒息而死。
由於成功捉倒獵物只有一至兩成，通常打獵會響夜晚或清晨涼爽嗰時候進行。
獵物包括羚羊、小羚羊、牛羚、斑馬、兔仔、雀仔、有時會係魚。食捉倒嘅獵物係要論資排輩嘅（跟喺斑獅子嘅地位高低而定）：獅子公先，然後係地位最高嘅雌性獅子，獅子仔最後。同一斑嘅獅子往往會為咗地位呢樣嘢爭餐死嘅，大打出手，往往會整嚫、整傷。
獅子亦會食腐爛嘅肉，畀踢出嚟嘅獅子公一般只食屍體，或者去搶其他食肉動物好似豹或獵豹嘅獵物，亦會喺鬣狗口中搶嘢食。

威脅
已知嘅 13 個亞種中有 2 種已經滅絕：北非獅（P. l. leo）住響北非。佢哋啲鬃毛尤其發達。1922年依個亞種嘅最後一隻野生嘅動物向阿特拉斯山脈被殺。歐洲嘅獅子係唔係屬於依個亞種以加已冇法再考證喇。
一啲私人嘅動物園試圖通過人工培養嘅方式重新培養依個亞種出嚟。仲做緊基因研分析，想搵出佢哋究景係依個亞種定係另個亞種。
南非嘅好望角獅子（P. l. melanochaitus）亦已經冇晒。呢個最大嘅獅子亞種響 19世紀畀獵人殺清光。
剩低嘅亞種 10 種住響薩哈拉沙漠以南嘅非洲。亞洲獅（P. l. persica）可能亦難逃滅絕嘅厄運。依個亞種曾經一度跌低到得返 20 隻，而家又恢復返到 300 隻。