英語（English）係印歐語系嘅日耳曼語族裡面西日耳曼語嘅一種，由古代從歐洲大陸移民大不列顛島嘅盎格魯、撒克遜同埋朱特部落嘅日耳曼人所講嘅語言演變出嚟，重通過英國嘅殖民活動傳播到世界各地。由於喺歷史上曾經同多種民族語言接觸，佢嘅詞彙由一元變為多元，語法由「多屈折」變為「少屈折」，語音亦都有咗規律性嘅變化。根據以英語作為母語嘅人數計算，英語可能係世界上第三大或者第四大語言（1999年統計為380,000,000人），但佢係世界上最廣泛嘅第二語言。上兩個世紀英國同美國喺文化、經濟、軍事、政治同埋科學上嘅領先地位令到英語變成一種準國際語言。英語係聯合國嘅工作語言之一。