About two dozen - see section below
雀，雀仔，文言亦都寫做鳥，係一類溫血、有兩隻腳（bipedalism）、同雀乸識生蛋嘅有脊椎動物。雀仔係由恐龍演化出嚟，而最早已知嘅雀仔係侏羅紀晚期嘅始祖鳥（Archaeopteryx）。雀一類生物分類學上係叫鳥綱，響脊椎動物亞門之下。
雀仔成身有羽毛，有嘴冇牙、代謝率高、心有四心腔、骨架又輕又勁硬、蛋殼硬錚。雀對前腳演化成翼，可以飛，不過有啲住響島上特有物種，有翼唔識飛；好似企鵝同鴕鳥咁。好多種雀仔每年長途遷徙。鳥類係社交動物：以視覺信號、歌同叫聲嚟溝通、識合作狩獵、合作養育後代、一齊遷徙。多數雀仔係一夫一妻制。
雀嘅大細可以分別好大，細到幾厘米長嘅嗡嗡鳥到成米高嘅鴕鳥都有。而家全世界人揾倒嘅雀有成九千幾種。
雀仔同人類文明、文化息息相關，由童話故仔到粗口；由文學到科學；由宗教詩歌到通俗音樂；由嘢食到寵物。 由1600年開始，大約有 120 至 130 種已經絕種，係因為人類嘅活動導致嘅，目前大約有 1200 種雀仔受到絕種嘅威脅，亦唔少人正努力保護佢哋。