貝澳，又叫杯澳，係香港大嶼山南岸一個聚居地。由老圍，新村，羅屋同鹹田等幾條村組成。歷史文獻中佢係叫螺杯澳。貝澳係一個海灣，有幾條涌由附近嘅山流入海，其中一條大嘅由向梅窩嘅山谷流入貝澳。海同涌形成鹹淡水交界嘅地形同生態，海邊沖積成長長嘅海灘。
貝澳嘅海灘係香港政府管理，係其中一個熱門游水嘅地方。沙灘後排劃咗做露營同燒烤地點。貝澳亦係香港少數聚集野生水牛群嘅地方，亦有廣闊嘅紅樹林，極具生態價值。